سفارت افغانستان در تاجیکستان: جرم فردی نباید به همه مهاجرین تعمیم داده شود

در پی بازداشت و اخراج شماری از مهاجران افغانستان در تاجیکستان، سفارت افغانستان در دوشنبه با ارسال نامه‌ای رسمی به وزارت امور خارجه تاجیکستان، خواستار برخورد قانونی و جلوگیری از تعمیم جرم افراد به تمامی مهاجرین شد.

این نامه پس از نشست مشترکی با حضور هیات رهبری سفارت، نمایندگان مهاجرین و مسوولان امور مهاجرین تهیه و به مقام‌های تاجیکستان سپرده شده است.

سفارت افغانستان در این نامه، ضمن ابراز تاسف از رویداد قتل یک زن در شهر خجند که گفته می‌شود عامل آن یکی از شهروندان افغانستان بوده، تاکید کرده است که هرگونه تخلف باید مطابق قانون بررسی شود، اما نباید اعمال یک فرد به کل جامعه مهاجرین تعمیم داده شود.

در متن نامه آمده است که اکثریت مهاجرین افغانستان در تاجیکستان افراد قانون‌مدار اند و طی سال‌ها در فضای امن این کشور زندگی کرده‌اند.

سفارت افغانستان همچنین نسبت به وضعیت خانواده‌های مشترک میان شهروندان افغانستان و تاجیکستان ابراز نگرانی کرده و هشدار داده است که اخراج یا محدودیت‌های گسترده می‌تواند باعث فروپاشی خانواده‌ها و آسیب‌های اجتماعی شود.

در بخش دیگری از این یادداشت، از مقام‌های تاجیکستان خواسته شده است تا در مورد زنان، محصلین، کارگران دارای اسناد قانونی و افرادی که در انتظار انتقال به کشورهای ثالث قرار دارند، همکاری و تسهیلات بیشتری فراهم کنند.

بر اساس این نامه، حدود سه‌هزار پرونده اسکان مجدد مربوط به کانادا در مراحل پایانی قرار دارد و بسیاری از مهاجرین سال‌هاست در انتظار انتقال به کشورهای دیگر به‌سر می‌برند.

سفارت افغانستان همچنین نسبت به وضعیت افسران پیشین، فعالان مدنی و پناهجویان سیاسی هشدار داده و گفته است که این افراد در صورت بازگشت اجباری به افغانستان، با تهدیدهای جدی امنیتی روبه‌رو خواهند شد.

در پایان، سفارت افغانستان آمادگی خود را برای همکاری با نهادهای تاجیکستان در راستای حفظ نظم عمومی، شناسایی قانون‌شکنان و تقویت اعتماد متقابل اعلام کرده است.