موج بازداشت و دیپورت مهاجران افغانستان در تاجیکستان پس از یک پرونده قتل

یک مهاجر افغانستان مقیم تاجیکستان می‌گوید پس از بازداشت یک شهروند افغانستان به اتهام قتل یک زن تاجیکستانی، فشارها بر مهاجران افغانستان در این کشور به‌گونه چشمگیری افزایش یافته و حتی افرادی که مدارک قانونی اقامت دارند نیز با خطر بازداشت و اخراج روبه‌رو اند.

این مهاجر که به دلیل نگرانی‌های امنیتی با نام مستعار «احمد» با اوج نیوز گفت‌وگو کرده، می‌گوید شهروندان افغانستان در تاجیکستان عملا در وضعیت ترس و محدودیت قرار دارند.

او گفت: «شهروندان افغانستان با وجود داشتن اسناد قانونی اقامت، شبیه زندانی در خانه‌های خود به سر می‌برند و به مجرد بیرون شدن از خانه، دستگیر و به افغانستان دیپورت می‌شوند.»

به گفته احمد، روند بازداشت و اخراج مهاجران افغانستان در روزهای اخیر شدت گرفته و بسیاری از خانواده‌ها نگران آینده خود هستند.

او هشدار داد که بازگرداندن اجباری این مهاجران می‌تواند جان شماری از آنان را در معرض خطر قرار دهد؛ زیرا به گفته او، بسیاری از شهروندان افغانستان به دلیل تهدیدهای امنیتی و فشارهای گروه حاکم در افغانستان، کشور را ترک کرده‌اند.

احمد افزود: «تمام شهروندان افغانستان که در تاجیکستان هستند بنا بر تهدیدات گروه حاکم ترک وطن کرده‌اند. حالا با دیپورتی و برگشت به افغانستان جان همه‌شان در خطر قرار دارد.»

با وجود تلاش‌های مکرر، اوج نیوز تا زمان نشر این گزارش موفق به دریافت واکنش رسمی سفارت افغانستان در تاجیکستان نشده است.

این اظهارات در حالی مطرح می‌شود که رسانه‌های تاجیکستان گزارش داده‌اند نزدیک به ۲۵۰ مهاجر افغانستان در ولایت سغد از خانه‌های شان بیرون کشیده شده‌اند.

براساس این گزارش‌ها، شماری از این مهاجران به افغانستان بازگردانده شده‌اند و برخی دیگر به مکان‌های نامعلوم انتقال یافته‌اند.

پیش از این نیز تاجیکستان حدود ۲۵۰ مهاجر افغانستان را به گونه اجباری به ولایت کندز اخراج کرده است.

گزارش‌ها نشان می‌دهد موج تازه بازداشت و اخراج مهاجران افغانستان پس از آن آغاز شد که یک مرد ۲۲ ساله اهل افغانستان در ولایت خجند تاجیکستان به اتهام قتل یک زن ۲۷ ساله تاجیکستانی بازداشت شد.